ఆంధ్రప్రదేశ్ ప్రభుత్వం స్కూల్ విద్యార్థుల తల్లిదండ్రులు-ఉపాధ్యాయుల మెగా సమావేశాన్ని ప్రతిష్టాత్మకంగా తీసుకుంది. ఈ నెల 7న రాష్ట్రవ్యాప్తంగా ఈ మెగా సమావేశాన్ని నిర్వహించబోతున్నారు. తల్లిదండ్రుల సహకారం, భాగస్వామ్యంతో ప్రభుత్వ పాఠశాలల్లో విద్యా ప్రమాణాలు మెరుగుపరచాలనే లక్ష్యంతో ఈ సమావేశాన్ని నిర్వహిస్తున్నట్లు తెలిపారు పాఠశాల విద్యాశాఖ కార్యదర్శి కోన శశిధర్ తెలిపారు. ఢిల్లీలో ఇదే తరహాలో తల్లిదండ్రులతో సమావేశాలు నిర్వహించినా.. పెద్ద రాష్ట్రాల్లో ఇలా ఒకేసారి తల్లిదండ్రులు- ఉపాధ్యాయుల సమావేశం నిర్వహించడం మొదటిసారని చెప్పారు.రాష్ట్ర వ్యాప్తంగా 45,094 ప్రభుత్వ, ఎయిడెడ్‌ పాఠశాలల్లో ఒకేసారి మెగా సమావేశాన్ని నిర్వహిస్తున్నామన్నారు కమిషనర్. ఆంధ్రప్రదేశ్ ముఖ్యమంత్రి చంద్రబాబు, విద్యాశాఖ మంత్రి నారా లోకేష్‌లు బాపట్ల పురపాలక పాఠశాలలో జరిగే కార్యక్రమానికి హాజరవుతారని తెలిపారు. రాష్ట్రవ్యాప్తంగా మంత్రులు, ఎమ్మెల్యేలు, ప్రజాప్రతినిధులు వారివారి నియోజకవర్గాల్లోని పాఠశాలల్లో పాల్గొనాలని విజ్ఞప్తి చేశారు. తల్లిదండ్రులుతో పాటుగా దాతలు, పూర్వ విద్యార్థులు కూడా ఆహ్వానిస్తున్నట్లు చెప్పారు. ప్రభుత్వ స్కూళ్లలో చదువుకుని ఉన్నత స్థానాల్లో ఉన్న వారి స్ఫూర్తినిప్పే విషయాలను విద్యార్థులకు వివరించాలని కోరారు.ఈ మెగా సమావేశం ఉదయం 9 గంటల నుంచి మధ్యాహ్నం ఒంటి గంట వరకు అన్ని స్కూళ్లలో జరుగుతుందన్నారు కోన శశిధర్. శనివారం జరిగే ఈ కార్యక్రమంలో రాష్ట్రవ్యాప్తంగా 35,84,621 మంది విద్యార్థులు, 71.60 లక్షల మంది తల్లిదండ్రులు, 1,88,266 మంది ఉపాధ్యాయులు, 50 వేలకుపైగా ప్రజాప్రతినిధులు పాల్గొంటారని వివరించారు. రాజకీయ ప్రమేయం లేకుండా ఎలాంటి ప్రచారం లేకుండా చదువుల పండుగలా కార్యక్రమం నిర్వహిస్తున్నట్లు చెప్పారు. తల్లులకు రంగోలి, తండ్రులకు టగ్‌ ఆఫ్‌ వార్‌ వంటి పోటీలు నిర్వహిస్తున్నట్లు చెప్పారు. సమావేశం చివరిలో అందరూ కలిసి మధ్యాహ్న భోజనం చేస్తారన్నారు.ప్రభుత్వ పాఠశాల పరిస్థితులు, విద్యార్థుల సామర్థ్యాలు, మధ్యాహ్న భోజన పథకంపై తల్లిదండ్రుల సూచనలు, సలహాలు తీసుకుంటారన్నారు కమిషనర్. అంతేకాదు పిల్లలకు స్క్రీనింగ్‌ పరీక్షల పూర్తైన 900 పాఠశాలల్లో ఆరోగ్య కార్డులు అందిస్తామని చెప్పారు. సాధారణ ప్రోగ్రెస్‌ కార్డుల స్థానంలో హోలిస్టిక్‌ కార్డులను విద్యార్థులకు అందిస్తున్న విషయాన్ని గుర్తు చేశారు. రాష్ట్రంలో ప్రభుత్వ బడులకు తొలిసారిగా స్టార్‌ రేటింగ్‌ ఇవ్వబోతున్నట్లు తెలిపారు. స్కూళ్లలో మౌలిక సదుపాయాలకు 5, అకడమిక్‌ ఫలితాలకు 5 చొప్పున స్టార్లు నిర్దేశించామని వివరించారు. రాష్ట్రవ్యాప్తంగా పాఠశాలల్లో పరిస్థితుల ఆధారంగా స్టార్లు కేటాయిస్తారని వివరించారు. రాబోయే ఐదేళ్లలో అన్ని పాఠశాలలు ఫైవ్‌ స్టార్‌ రేటింగ్‌ సాధించాలనే లక్ష్యంతో పనిచేస్తామన్నారు. అంతేకాదు రాష్ట్రమంతా స్కూళ్లలో మధ్యాహ్న భోజనంలో ప్రస్తుతం ఒకే మెనూ ఉందని.. కానీ సంక్రాంతి నుంచి జోన్‌కొక కొత్త మెనూ అమల్లోకి వస్తుందని శశిధర్ తెలిపారు.
