రాజమహేంద్రవరం వాంబే గృహాల్లో నెలకొన్న సమస్యలను వెంటనే పరిష్కరించి స్థానికులకు ఇబ్బందులు లేకుండా చూడాలని ఎమ్మెల్యే ఆదిరెడ్డి శ్రీనివాస్ అధికారులను ఆదేశించారు. స్థానిక ఆదెమ్మ దిబ్బ వాంబే గృహాలను స్థానిక కూటమి నాయకులు, అధికారులతో కలిసి పరిశీలించారు. ఈ సందర్భంగా ఆయన మాట్లాడుతూ లీకవుతున్న శ్లాబ్లకు మరమ్మతులు చేపట్టాలన్నారు. మంచినీటి సౌకర్యం మెరుగుపరచాలన్నారు. మురుగునీరు సక్రమంగా పారేందుకు స్థానికంగా ఉన్న డ్రైనేజీ వ్యవస్థను మెరుగుపరచాలని ఆదేశించారు. మంచినీటి కోసం అక్కడ ఉన్న మోటార్లు సక్రమంగా పని చేసేలా చూడాలన్నారు. అలాగే ఆ ప్రాంతంలో చేపట్టిన సీసీ రోడ్లు, మేజర్ డ్రైనేజీ నిర్మాణం త్వరితగతిన పూర్తి చేయాలన్నారు. ప్రజలు తమకు విన్నవించిన ప్రతి సమస్యకు పరిష్కారం చూపించడం జరుగుతుందన్నారు. స్థానిక నాయకులు, అధికారులు తదితరులు ఆయన వెంట ఉన్నారు.
